Chin Ramkulh Hruaitu Pu Terrance San Mawi NiKhuai In Mual In Liamsan

Chin State Administration Council Chairman Pu Terrance San Mawi NiKhuai (kum 65) cu tuizing February 11 zinglam ah lungphucawl in mual in liamsan a si. February 1, 2021 ah Myanmar ramsung thuneihnak cu ralkap pawlin an la ih ram hruaitu dingah mithar an la vivo.

Chin ramsung kaihruaitu dingah sibawipi hminthang Dr. Ni Khuai ih fapa upabik Pu Terence San Mawi Nikhuai cu February 2 ah ṭuanvo an pe.

Himi thuhla ah CH pawlin an phone ih Pu Terence San Mawi in “Thuhnokbuai lai ah ṭuanvo pek ka siih ziangti’n a si ding timi tla ka thei ve hrih lo. Asinan, ram le miphun hrangah ti thei tawk thazang suah in ka ṭuan ko ding. Nan zapi ih ṭan le bawmnak ka ṭul tuk” tiah arak sim.

Pu Terrance San Mawi NiKhuai cu Chin ramsung ih high court ah Chief Justice arak si, cumi hnuah Chin State Administration Council Chairman ṭuanvo pek a si nan February 11 zinglam ah lungphucawl in a thi.

A pa Dr. R. Ni Khuai Ih Thuanthu: Dr.R.Ni Khuai cu Falam peng Lumte khua mi a si ih kum 1919 September ni 19 ah a suak. A pa cu Wkh Major Kap Cong (MBE; BGM) a si ih a nu cu Pi Lang Hngel a si. Suahpi unau pali a nei ih amah hi upabik a si.

Kum 1925 June in tlawngkai a thok. Phun hrek ihsin phun li tiang Congkua phunli tlawng ah, phun nga ihsin phun sarih tiang Falam Middle School ah, phun riat le phun kua cu Sagaing High School ah, phun hra cu Rangoon ih St.John High School ah a kai ih 1937 kum ah phun hra a ong.

I Sc cu Rangoon State College in a ong. Second MBBS cu Rangoon Medical College in 1940-41 ah a ṭheh. Kum 1943 in India ram ih University of Lucknow ah sibawi a zir peh ih kum 1949 December ni (20) ah MBBS dikari a ngah. Laimi lakah a hmaisabik MBBS dikari ngahtu a si.

India ihsin a tlun tikah Rangoon ih General Hospital (RGH) ah hnaṭuan a thok. Kum khat RGH ih hna a ṭuan hnu kum 1952-1955 sung England ram ih Edinburge University ah Surgery Special in a zir ih ‘A’ class in a ong. Kawlram sungah FRCS dikari ngahtu a pahnihnak a si.

Curuangah acozah upa in Rangoon ih sibawi zirnak tlawng sazaci (professor) ṭuan dingin hnaṭuan an pek. Asinain a pa ih thu a ngainak in siseh, amah thinlung suak ih Lairam le Laimi phun a seherhnak ruangah siseh Rangoon ih Professor ṭuan dingah cohlang lo in thu a khirh. Curuangah amah ih hrilnak bangin Falam sizung ih hnaṭuan dingin kum 1957 ah acozah in an thlah.

Falam sizung ih hnaṭuan a thok tikah Falam sizung cu ihkhun (75) a um. Amah ih Special a zirsuakmi cu Surgery a si bangin thilri umsun thawn hna a ṭuan ruangah mina tampi in Falam sizung an ra pan ciamco. Hnaṭuan thei dingin tlunlam upa pawl hnenah thilri a dil ṭheu ih an pek ṭheu ruangah operation tuahtheinak thilri tla kim in a um thei.

Culawng si loin kum 1963 ah ihkhun 100 ah acozah in a ṭhan. Mina ihnak ding innpi pathum saknak tla a ngah. Dr. R.Ni Khuai Falam ih hna a ṭuan sungah Nu le Nauhak kilkhawinak (MCH) a din ih a hlawhtling zet. Cun, nauhak kilkhawidan ca-uk, First Aid ca-uk, sii indan le sii eidan ca-uk le Harhdamnak ca-uk pawl tla a tuah.

Dr.R.Ni Khuai cu acozah hnaṭuantu pakhat a si bangin Falam ih kum hleihnih a um hnu kum 1969, December ah Mandalay sizungpi ah a ṭhawn. Kum 1971 ah Mandalay ihsin Yamethin ah, kum 1973 ah Meikhtila ah a ṭhawn.

Meikhtila sizungpi ih kum ruk hna a ṭuan hnu ah kumkim pinsin in kum 1979 ah pinsin a lak. Pinsin a lak hnu ah Meikhtila ih anmai’ inn ah kum hleikhat a um. Kum 1990 ah England ram, Town Bridge khua ah a nupi Jasmine Hope ih fingkhawi ding le tuamhlawm dingin a feh. Dr.R.Ni Khuai cu kum 2003 May ni 8; amai’ kum 82 a kim tikah leitlun a nunnak in a cawl. Fapa (6) le fanu (4) a nei. (Rev. Khar Thuan)

Be the first to comment

Leave a Reply

Your email address will not be published.


*