Mipa 7 In An Sungkhat Nauhak Kum 12 Mi An Pawngsual

Thailand, Suphan Buri ih um nunau nauhak kum 12 cu an sungkhat mipa 7 in an pawngsual ṭheu. Mipa 5 cu kum 21-51 karlak mi an si, pahnih cu tleirawl an si. Pawngsualtu lakah an makpa khal a telve, kum 51 mi in a pawngsualnak a rei zet zo.

Mi hnenih na relsuah asile kut ka lo thlak ding tin a hringhro ruangah a relsuak ngam lo. Pawngsualtu 7 cu an sungkhat lawng siloin an innkiang naivai ih um an si. Cutin, an pawngsual ṭheu nan khuasung mipi in an thei dah lo, sungkhat naivai an si ruangah an zum ban lo.

Nauhak kum 12 mi cu a unu kum 29 hnenih um a si, a u in a thei ṭheu nan a relsuak ngam ve lo. A naunu in a pumna / taksa naa a soisel ṭheu ruangah a tuar thei nawn lo ih Suphan Buri palik hnenah a sim thei. Pawngsualtu 5 cu an kai zo, 2 cu kumkim lo an si ruangah thusutnak neisal dingin an thlah.

Thiamlo coter an sile kum 20 sung thawng an tla ding, cun hriamhre kengih pawngsual an si ahcun damsung thawngtla ding an si. Bangkok post ih a tarlang dan vek asile Thailand ramsung ah kumtinten pawngsual tong 30,000 an um. Minute 15 danah pawngsual tong an um ringring tinak a si, cumi lakah 4,000 lawngin palik an theihter. (Ref: BP)

Be the first to comment

Leave a Reply

Your email address will not be published.


*